上次去倫敦已經是去年三月。一個寒冷的上午，去了特拉法加廣場。英國開關，六月起將與多國建立疫苗護照。
一犬吠影，百犬吠聲，瘟疫時代，即使21世紀，人云亦云，網絡令許多人的判斷力，下降為同中世紀黑暗時代見到幾個女人在樹下傾偈跳舞就話佢哋係女巫的水準差唔多。
例如，復必泰喺香港打咗幾十萬之後，不幸逝世者三數人，就令人諗起有報道英國阿斯利康疫苗會引起血栓副作用，亦會死人，尤其係25歲樓下，屬於高危。
如果係真，英國今日確診狀況應該拍住印度，唔屍骸遍地都舉國淒涼，而且香港寄宿學校的父母，就會愁雲慘霧唔俾啲仔仔九月返英國復課——英國的寄宿學校，會因為大量青少年「中副作用」死亡而執笠一半以上，亞洲虎媽大為震驚而起哄，個仔仔繼續Online多一年，集體大叫回水。
但係冇喎。英國醫院的床位開始過剩，歐盟準備71後與英國對發疫苗護照，阿斯利康( Astra-Zeneca )、輝瑞（ Pfizer )、麥當娜（Moderna )三大疫苗，好似牛津、劍橋、倫敦大學，三家平起平坐，學位學歷一概承認。群體免疫達成有望，旅行解封，英國國民開始搶購歐洲廉航機票，全國人氣高昂，準備恢復消費。
而我一個香港老友今年在英國大學畢業個仔，仲啱啱喺倫敦金融城搵到佢生平第一份full time工添，公司叫佢cut短在香港打遊戲機嘆世界的網絡comfort zone 好日子，即刻回國報到。
個仔話：Yes sir——佢未返工已經學定擦鞋，同公司個human resource manager 話：屈左喺香港咁耐好唔開心，因為焗住要打咗兩針復必泰，如果早啲可以返倫敦，一定會優先同英國國民和未來老板同事共進退，一齊打AZ阿斯利康。
全球病毒瘟疫，由第一日開始，就被各種混亂的資訊騎劫。
疫苗發明之後，各大國的產品，本來可以在科學、事實、數據，三大因素的基礎之上，由專家指引、公民以常識判斷，文明國家政府分明選擇疫苗，但因網絡資訊爆炸的惡果，專業新聞傳媒低落，以至假新聞流行、誤解和抹黑滿天飛。
自2020年12月9日到2021年5月12日的五個多月以來，全英國打了復必泰疫苗的總人口共1,170萬，其中打齊兩針的990萬。
打了阿斯利康疫苗的總人口共2,390萬，打齊兩針者900萬。
美國製造的Moderna疫苗，供應較少，打了第一針的有20萬人。
歐盟少數國家，包括荷蘭和丹麥，聲稱接種阿斯利康疫苗之後有引起血栓死亡個案。然而，英國是第一個普及接種由牛津參與研發的阿斯利康疫苗的國家。
英國每日確診宗數，由2021年1月初，最高的每一百萬人近900至1,000宗，急劇回落，到2021年2月底，已減至每一百萬人低於100宗。2021月5月6日，每日確診每一百萬人只有約39宗。
五月十九日這天，全國確診只有2696宗，而英國總人口約為為六千六百萬。
五月十九日當日確認的新冠狀病毒死亡人數，全國也只有3人。
4月中，牛津大學數據指出，與腦靜脈血栓有關的個案，mRNA疫苗包括復必泰輝瑞及Moderna，每100萬人有4宗，阿斯利康則有5宗。
若阿斯利康「有害」，英國全國確診數字四個月來不會插水式下降，疑似副作用死亡人數，每百萬人口僅少於復必泰一人，而且不論邊隻打完後死亡人士，各自有長期病患。
藥劑業是全球利潤極高的生意，美國和德國一向享有強勢的霸權。新聞媒體和宣傳工具，美國支配地位。英國脫離歐盟，卻因疫情而可以享受獨立分配疫苗的優勢，盲打誤撞，減少了歐盟國家許多配額爭奪和官僚架構之弊。
講到一個錢字，你估西方傳媒百分百有真相？正如好多人相信：中國咁強大，美國十分眼紅。咁人哋英國單拖牛津大學整咗隻拍住輝瑞復必泰疫苗出來，歐美又點會冇人嫉妒？
英國雖有過變種而關閉城市，但公司學校，大舉復工復課，事實壓倒政治，數字就是鐵證。
香港人就冇得打AZ阿斯利康。國家和政府，入少一兩隻疫苗，打完針後未確定科學因果關係的死者，比例不變，只是他們的人民少了一個選擇。
而英國和歐洲，都將會Business as usual 。無論有冇BNO，但願人人有本疫苗護照。
Search